Also jetzt saget au a mole, frier, do hot mr die Leud eber andre Leud kenne glärnt, aber seids des Interned gibd, do god mr no uff rendafrend oder so äbbes. Ond jetzt lerned sich die Leud eber dwidder kenna. Des mit dem dwidder isch a Thema fer sich. Aber mir hend ons hald jetztele a mola so kenneglernd.

Weil mr sich jo kennd hot mr no denkt, ma kennd doch au a mola sei eigene Interendseid macha und verzähle, wer mr isch ond was ma duad. Die Syd hot des au scho mol gmacht dohanna ond jetzt han i denkt i mach des au. Die andre solled au noch äbbes schreiba, aber wies halt älleweil so isch, oiner muss damit afanga. Ond des hod au sein Grond, worom des jetzt uff Schwäbisch isch. Worom welleter jetzt wissa? Do sag i bloß oins: ganget au zum dwidder, no kriegeder des älles mid.

Jetzt woiß bloß no koiner, was des twuetopia isch, gell. Ond i solls wiedr erklära, dabei kann i net a mola mein Nama tanza (aber des mit dr Sonn krieg i meischdns na)! Des send halt Leud, die bei dwidder send ond sich au scho richdig kennen glernt hen. So äbbes nennd mr no a tweetup (schwätz: dwiedap). Heimadland, so viel Fremdwerdr! Älleweil des Englisch. An Aussaposchda hemmer sogar au scho kriegd. Also, des send halt Leud aus Diabinga.

Ond wer jetzt no meh wissa will, der sod sich bei dwidder amelda ond do kenneter no noch #twuetopia sucha.